Ua toe tatala le ofisa tutotonu o le faafoega o faalavelave e tutupu faafuase’i lea e ta’ua faapuupuu o le NEOC, poo le national emergency operation center i tunaimato, e tali atu ai i le faatupula’ia pea o mafui’e o loo lūlū i nofoaga tu lalata i le maugamū o vailuuluu i motu o le manu’atele i amerika samoa. O le faai’uga o le vaiaso na aumai faalauaitele ai e le ofisa o le faafoega o faalavelave faafuase’i se pepa o faamatalaga faalauaitele ina ia silafia ai e lo tatou atunuu lea tulaga, ma ua faapea mai ai:
“O le maugamū o vailuuluu o se maugamū i lalo o le ogasami mai le itu i sasa’e o le atu samoa, e tu lata i manu’a. Na faatino se su’esu’ega a le malo o amerika samoa ma le ofisa su’esu’e o ogasami ma le vanimonimo a le malo tele o amerika (NOAA) i le tausaga e 2017, ma maua ai o loo ola pea ma e ono iai se avanoa e ono alia’e ai o se maugamū”.
O loo mata’itū e le ofisa o le vaaitau mafui’e o loo tutupu mai pea i lea vaega o le atu amerika samoa. Ma e tele lava se fesoota’iga o mafui’e o loo tula’i mai i vailuuluu, faapea isi maugamū o loo i lalo o ogasami o amerika samoa.
I le aso 8 aokuso 2022, na tuuina mai ai e le ofisa o le saogalemu faalotoifale a amerika samoa se pepa o faamatalaga e faalauiloa ai le tatalaina o le nofoaga autū o faalavelave faafuase’i i amerika samoa ona o le faatupulai’a pea o mafui’e lūlū e lipotia e tagata o loo alala ma pāpāaao i motu o ‘ofu ma fiti’uta i le motu o manu’a.
Talu mai le aso lulu na te’a nei, 10 o aokuso 2022, ua oo i le 41 mafui’e ua faamauina e le ofisa o le vaaitau i samoa. E lē masani ai ona tele ni mafui’e lūlū i lea nofoaga. O le malolosi o nei mafui’e e i le va o le 2.3 agai i le 3.6 lo latou malolosi i le fua mafui’e. Ma e na o le pau lea o le faamatalaga o loo faamautuina i le taimi nei, e faaopoopo i lipoti o loo lipotia e tagata o manu’a.
Na amata mai i le aso tofi, 11 o aokuso 2022, faatalatalanoaga ma feutaga’iga a le ofisa vaaitau a samoa ma amerika samoa, ofisa su’esu’e o ogasami ma le vanimonimo a amerika (NOAA), ofisa tutotonu o sunami a le pasefika i hawaii ma le ofisa su’esu’e o fanua ma faafanua a amerika. O lenei fuafuaga ina ia fefaasoaa’i tomai ma faamatalaga ina ia iloa ma faamanino atili le mafuaaga ma le faapogai o le tutupu o nei mafui’e, aemaise o tapenaga mo se faalavelave e ono tula’i mai.
E lē o manino i le taimi nei pe ono alia’e mai se maugamū, poo ni eleele solo i lalo o le sami e ono tula’i mai ai ni sunami.
Peitai ane, ua tatala le ofisa o faalavelave tutupu faafuase’i (NEOC) ina mata’ituina lelei le tulaga o loo tula’i mai nei i vailuuluu ma faamautu tapenaga mo le tali atu i ni faalavelave e ono tula’i mai e aofia ai le alia’e mai o se maugamū, sunami faapea kasa oona poo le asu e mafua mai i maugamū. Ma o le a galulue faatasi ma itutino uma talafeagai mo le faatinoga o tapenaga faapea faamatalaga e tuuina atu i le mamalu o le atunuu.
O loo faaauau pea galuega a le ofisa vaaitau e mata’itū ma tuuina atu faamatalaga lata mai i le ofisa o faalavelave tutupu faafuase’i.
Ma ua fautuaina le mamalu o le tatou atunuu aemaise i latou o loo alala i nofoaga tulalata i le sami, ina ia nofo mataala i taimi uma ma faafesoota’i le ofisa tutotonu o le faafoega o faalavelave tutupu faafuase’i (NEOC).
