Ua faamautu se faaiuga a le Kapeneta i le galuega o le fausia o se Flea Maketi fou i Sogi i le toe foi ane o lea maketi i Savalalo i le nofoaga sa iai muamua lea e tu lata i le nofoaga faatali pasi ma le maketi o ia e tumutumu iai tagata o le atunuu.
O le galuega lenei o le fausia o se maketi fou i Sogi na amata mea ai le faigamalo sa iai i le lima tausaga ua mavae peitai o lea ua suia le faigamalo ma ua taofia ai ma lea fuafuaga.
Ua faailoa mai i le faaiuga o le vaiaso se finagalo o le Minisita o Alamanuia ma Leipa le tofa Leatinuu Wayne Fong ua faamaonia ai lea fuafuaga.
Ua ia faailoa foi o le a faatupe e le Faalapotopotoga o Eleele a Samoa (Samoa Land Corporation) lea galuega ae o loo iai foi le fesoasoani a le malo o Niu Sila i le fausia lava o lea galuega.
O le nofoaga i Savalalo sa iai le Maketi na faaumatia i le afi ia Ianuari o le tausaga e 2016 mai lena taimi sa faia le fuafuaga a le malo sa iai e faatutu faleie tetele e faagaioi ai pisinisi laiti seia oo ina faia leisi faaiuga e aveesea uma pisinisi laiti ae faasee atu i se nofoaga lata i le Maketi i Fugalei ae tapena se vaega o fanua o le malo i Sogi e fausia ai se maketi fou mo ia pisinisi.
O le nofoaga lea o loo iai atugaluga e maualalo e lofiagofie i taimi o timuga ma lologa, o lea la ua le taunuu ona fausia ai le fuafuaga a le faigamalo ua iai nei ae toe faasee ane i Savalalo pe a maea ona fausia le nofoaga fou.
O le nofoaga foi lea e afegofie e tagata lautele ma maua ai faatau mo ia pisinisi laiti.
