Ua silasila mamao alii ma faipule o le afioaga o Sapapalii i Savaii e saga atina’e pea taaloga mo tupulaga o le nuu aemaise o le motu i Savaii, e pei ona talosaga ai nei i se fesoasoani a le malo o Saina e fausia ai se malae taalo lelei poo se stadium.
Ua faailoa e se matai o le nuu o le Faatonu foi o le taamilosaga lakapi fitu o le FedPac Mataniufeagaimaleata Sapapalii Sevens, o le tasi lea o fuafuaga ma le talitonuga afai ae talia le latou talosaga e Saina o le a iai se suiga i le vaaiga i le malae a le aoga tulagalua a le afioaga o loo faaaogā i le latou taamilosaga lakapi ta’itoafitu lea ua tolu nei tausaga o faatino.
