O le saunoaga a le alii minisita o Tupe ia Lautimuia Afoa Uelese Vaai, o loo tālia seia aumai se tali a Panoa e tusa o mataupu ua faatulai atu ia te ia ona fua lea iai o se suesuega.

Ua faaalia foi o le faagasologa lava lenei masani mai faigamalo ua tuanai ai.

O lea suesuega ua faailoa o le a tuufaatasi ai le Matagaluega o Tupe ma le Matagaluega o Faalapotopotoga a le Malo.

O le mataupu e faatatau i tuuaiga ua faaaogā sese e Panoa lona malosiaga o le Taitaifono o le Board a le NPF i le faaaogāina o tupe mo lana telefoni ma le Ipad faapea ai ana faigamalaga i fafo, ua faailoa manino e Lautimuia o le mataupu lea a le MPE o latou e gafa ma fono faatonu.

Na fesiligia foi le alii minisita i le tulaga sa iai mea sa tutupu faapea muamua pe sa faatino iai ni suesuega e le faigamalo ua tuanai, na faailoa e lē o mautinoa ni faamaumauga ae o le tulaga e iai pe a faatino se suesuega o le a tilotilo uma ai i tulaga ia pe sa faia ni suesuega muamua i mataupu sa tulai mai i nonogatupe a pisinisi i le NPF.

O le faagasologa lava ia e pei ona ta’ua, a mae’a se suesuega o loo iai ni tulaga ua solia ma ni moliaga tau soligatulafono ua faaalia manino mai o tulaga ia e tuuina atu e suesue e le faamasinoga.

Ua ta’ua foi o nonoga tupe pe a faamatuu atu o loo iai lava faiga faavae a le NPF i tulaga uma e puipui ai e pei o ni aseta e faamauina ai ma lona aogā poo le value e fua iai le nonoga tupe e tuuina atu.

Ua faailoa o le tiute tausi lea a le Board poo le duty of care, ae o le tiute o le tagata e onaina le saofaga poo le duty of ownership o le tuuina atu o lona faatuatuaga e tausia lelei ai e le Board lana tupe, ma afai ae faatalale iai le Board e ogaoga foi le tali mai a le tulafono i lea tulaga.