O loo faia nei suesuega a leoleo i le mafuaaga tonu o le maliu ai o se tama mai le afioaga o Faleula i se faalavelave na faaalia e le sui Komesina o Leoleo susuga Auapaau Logoitino Filipo na pa’ū iai se pakete o se masini mamafa.
O le tamā ua fano le soifua sa galue i le kamupani e ana le masini, faaalia e le Sui komesina o Leoleo o faamatalaga ua tuuina atu o loo taua ai sa iai se faaletonu i vaega o le masini e mau ai le pakete ma mafua ai ona mamulu ma palasi ese ma aafia ai lē ua maliu. Taua foi e Auapaau e tūgā ma ogaoga manu’a o lea tamā.
Ae i nisi o mataupu mai le Matagaluega lava o Leoleo e faatatau i ni alii se toalua na maliliu ina ua malelemo i se faiva i ni afioaga i Savaii, ua faailoa e Auapaau ua faamalieina le pule o maliu poo le coroner i le mafuaaga ma ua tuuina atu ai o la tino maliu i o laua aiga mo sauniga faai’u.
