E lē o mautinoa i faamaumauga i Samoa i le taimi nei, pe to’afia nisi sa fananau pe soifua mai i le va o le tausaga e 1924 ma le 1949 lea e agavaa i le tulaga tagatānuu poo le sitiseni Niu Sila, ina ua pasia e le Palemene a Niu Sila i le Aso Lulu o lenei vaiaso le faitauga lona tolu, ma o le faitauga mulimuli foi lea o le tulafono taufaaofi poo se pili sa tuuina atu e le faipule o lea Palemene, o se tagatānuu o le Atu Kuki, o Teanau Tuiono o le vaega faaupufai o le Green Party.
O lea tulafono taufaaofi sa toe finauina ai le faafoi o le tagatanuu Niu Sila o tagata Samoa na soifua mai i le va o le 1924 ma le 1949 na aveesea i se tulafono a le Palemene lava o Aotearoa i le taimi o pulegamalo a le Palemia o Sir Robert Muldoon i le tausaga e 1982.
Ua faaalia i se lipoti a le leitio a Niu Sila, afai ae sainia e le Kovana Sili o Niu Sila i le Aso Gafua o le vaiaso a sau lea tulafono ma amata ai loa ona faamalosia, o le a tatala loa le avanoa mo tagata Samoa na soifua mai i tausaga e pei ona faailoa atu e talosaga ai o latou tagatānuu poo sitiseni Niu Sila.
Ua na o i latou lava ia e agavaa ae o a latou fanau e lē o aofia ai, ma ua faaalia ai i le lipoti a lea leitio faavaomalo o le tasi lea o laasaga o le a finau ai i latou sa taulamua i le finauina o le toe faafoi o le sitiseni Niu Sila o o tatou tagata e agavaa.
Faaalia e le afioga Anae Arthur Anae i le leitio a Niu Sila o se isi lea o ana taumafaiga faatasi ai ma nisi o loo lagolagoina lea finauga.
