O le Aso Tofi o le vaiaso nei o le a toe valaau ai talosaga apili e lua a Li’o Faataumalama Auava, Fepulea’i Faasavalu Faimata Su’a, Lise Marie Schmidt, faapea Samuelu ma lona toalua o Sivai, faasaga i le faai’uga a le Faamasinoga Faaitumalo ua lē talia ai le latou talosaga e faasee ese le faamasino sinia o le Faamasinoga Faaitumalo le afioga Talasa Atoa Sa’aga mai le suesueina o o latou moliaga.

O loo apili foi e i latou ua molia faatasi le faai’uga ua lē talia ai le finauga a loia mo i latou ua molia ina ia tolo atu le suesueina o o latou moliaga i le tausaga fou e faato’ā avanoa ai a latou loia mai fafo.

O le valaauga i le Aso Tofi nei o ia talosaga apili o le a saili ai se aso vave e suesueina ai, a o lei oo i le masina o Aokuso lea ua faatulaga e valaau ai molimau o moliaga o i latou e toalima o loo molia faatasi.

O le Aso Gafua o le vaiaso nei na valaau ai lenei mataupu i le Faamasinoga Maualuga lea o le a suesue ai talosaga apili e lua o le a toe iloilo ai faai’uga a le Faamasinoga Faaitumalo ua lē talia ai le faasee ese o le faamasino sinia mai le tagofia o lea faamasinoga, faapea le talosaga e tolo atu i le tausaga fou le valaauina o molimau.