Ua faailoa e le Komesina o leoleo le tofa Auapaau Logoitino Filipo moliaga e sefulu o loo tuua’ia ai le Faipule o Gagaifomauga 3 le susuga Laauli Leuatea Polataivao Fosi Schmidt, i le tuana’i o le Aso Faraile na te’a nei na faia ai moliaga o Laauli.
Ua faailoa e le Komesina i le leitio a Niu Sila e 3 moliaga o le taumafai e taofi le faia o le amiotonu, 3 moliaga o le faia o faamatalaga sese i le faamoemoe e faaleaga ai le tulaga ta’uleleia o se tagata, 2 moliaga o le lafo o ni upu taufaifai e lepeti ai le filemu, ma moliaga ta’itasi o le taupulepule e faatino se solitulafono, ma le moliaga o le faasoesa e faaaogā ai masini faatekonolosi.
Sa tuuina atu se talosaga i le fia maua o se avanoa e tāpā ai se finagalo o le tamaitai Palemia e tusa o sana faai’uga i le faamavae poo le faamuta lē tumau o le tofi minisita o le sui Faipule o Gagaifomauga 3, peitai ua lua aso e le’i maua se tali o lea talosaga.
Ua na o na faailoa mai e lana failautusi ua uma ona faaoo i le Palemia le fesili o loo fia maua iai sona finagalo.
E le’i manuia foi sa’iliga mo se finagalo o le susuga Laauli Leuatea Polataivao Fosi Schmidt, ae o le aso 4 o le masina fou o Fepuari e tulai ai i le faamasinoga.
