Soo se foa’i e maua i le agalelei o isi e aunoa ma se seleni e alu ai, o le itu mautinoa e matuā talia ma le faafetai ma le fiafia auā o le lagona lava lea o se tagata e lima vaivai ma utiuti le faasoa tau tupe.
O lagona ia o le ta’ita’i ma le faaili a leoleo i Samoa ina ua afea i le agalelei o leoleo a le Malo o Ausetalia i se foa’i o mea faaili e pei o pu ma kitara e ola i le eletise faapea isi totoga e mana’omia tele e malu o le malo i le faatinoina o le latou tautua e ala i le faaili.
Ua faailoa e le matāgaluega lea foa’i ua tauala mai i le polokalame o loo faipaaga ai le matāgaluega o leoleo, falepuipui, ma le toe fuata’ina ma leoleo o Ausetalia le Australian Federal Police.
I se sauniga na tauaao ai lea foa’i na momoli ai le faafetai a le pulega o le faaili a leoleo ma le matāgaluega i le malo o Ausetalia auā o se foa’i ua fetaui lelei ma tapenaga a le faaili a malu o le Malo i le Fono a Malo o le Taupulega aemaise o isi tautua masani i sauniga faalemalo.
