Ua ufitia i le ao pogisa le matagaluega o leoleo, falepuipui ma le toe fuata’ina, aemaise o aiga, faapea le toalua ma le fanau o se malu o le Malo sa umia le tulaga faaleoleo o le satini leoleo nanā poo se Detective Sergeant, e mafua i se manu’a mai se laau malosi.

Na tupu i Fasitoouta i le Aso Gafua o le vaiaso nei lea gaioiga ua maliu ai le susuga Peniamina Perite, a o faatino ona tiute e ala i le sailia o se tagata o loo masalomia i se solitulafono na maliu ai se tagata i le Aso Sa na te’a nei.

Ua faaalia i se pepa o faamatalaga mai le matagaluega o leoleo, falepuipui ma le toe fuata’ina ua sola sola lē o loo masalomia ma o loo sailia pea, ma ua galulue faatasi ai ma le afioaga o Fasitoouta mo le sailia o le tagata o loo masalomia.

O le malu o le malo ua fano le soifua ua faamatalaina e le matagaluega o se tasi o leoleo e galue filigā ma le lē faalogologo tiga, ma o se tasi o malu o le malo e tausaafia ona uiga i totonu o le matagaluega.

Ua faailoa e le matagaluega le tapena ai o se sauniga faamanatu poo se memorial service mo le susuga Peniamina Perite ma o le a faailoa le aso e faia ai mo le silafia e ona aiga ma ana uo aemaise o alii ma tamaitai leoleo.