O nisi o faatapulaa ua faia i visa aoga e faatatau i tulaga tau faigaluega ua toe faatulaga nei e Ausetalia ina ua toe amatalia le isi tausaga faaletupe fou ma ua faailoa ai le lē fiafia o le toatele.
Na amata i le aso muamua o le masina lenei ona toe faatulaga ia tapula e aofia ai le aofai o itula e mafai ona faigaluega ai le tagata o loo iai le visa aoga i totonu o le lua vaiaso.
Sa faamuta ia tapulaa i le taimi o le koviti ma aveesea ai i le 2022 ona o le sailia o ni tagata faigaluega peitai ua lipotia i le asō ua toe amatalia.
O se popolega mo le aufaipisinisi ae faapea foi tamaiti aoga o loo i lalo o lea visa.
Fai mai se tasi o faipisinisi i Sini e le taumate o le a iai foi le aafiaga o tapulaa nei i lana aufaigaluega o le toatele o tamaiti aoga faavaomalo ma fai mai a ia e ao ona silafia e le malo o ituaiga pisinisi e pei o fale’aiga lea foi e aofia ai ma lana pisinisi sa matuai tele aafiaga i le taimi o le koviti ona o le lē lava o le aufaigaluega ae o lea foi o le a toe faaopoopo mai iai ma ia tapulaa o lona uiga o le a matuai toe faatetele ai foi lea faafitauli.
Fai mai o i latou o loo umia visa aoga ma ua galulue nei i le auaunaga o le tausiga o tagata matutua talu mai le aso 9 o Mati o le tausaga nei, e mafai ona faaauau pea i aiaiga sa sainia seia oo i le aso 31 o Tesema, lona uiga e lē o aofia latou i itula faatapulaa e pei ona faailoa nei.
