O se tina mai Kuiniselani lea ua lipotia ua fana e le tagata ma maliu ai a o saofai i lana tavale i le driveway o lona fale a o iai faatasi ma si ana tama teine ma le isi teineititi.

O tala mai le 7News ua ta’ua ai le molia o se alii e suafa ia Ryan Geoffrey Cole 31 tausaga i le fasioti tagata ma le taupulepule e fasioti i le faalavelave lea na tulai mai i le aso ananafi i le faaitu o McKay i Kuiniselani.

Fai mai o lē ua molia o le tuaoi o le tina ua maliu ma o le te’a o le 5 i le afiafi ananafi na tupu ai le faalavelave.

O si tina ua maliu e 34 tausaga ma lana tama teine 11 tausaga ma le isi teineititi 12 tausaga o le uo a le tama a lē ua maliu, sa iai uma i le taavale ma sauni e agai ese ae feta’ua’ina na fana ai e le alii lea lē ua maliu.

Na tamomo’e ese teineiti i le aiga tuaoi ma momo’e ane ai se tamā e 66 tausaga e fesoasoani ae fana ai foi e le alii lea, fai mai o loo tigaina i le falemai ae lei aafia nai teineiti e pei ona faailoa i le lipoti.

Na pu’e e leoleo le alii lea poo le 8 i le po anapo ma tulai ai i le faamasinoga mo sina taimi i le taeao analeila ma ua toe tolopo le mataupu mo a taeao.

O loo faatino suesuega i lenei foi faalavelave matuia.

Puna o Faamatalaga: https://7news.com.au/news/man-charged-over-fatal-shooting-of-south-mackay-woman-not-known-to-his-alleged-victim-c-15081319