E lē taufaailo le mata’ina o taumafaiga a alo ma fanau o le ‘au a le Manu Samoa i le vaiaso na se’i mavae atu nei ina ua ia faato’ilaloina Italia i le la taaloga faitaulia i laufanua o Samoa i le Apia Park.

O se manumalo na molimauina ai le toatele na faailo i luga o upega tafailagi lo latou mitamitaga i tamafanau ma a latou taumafaiga i le taaloga faavaomalo muamua, aemaise o le uluai taaloga ua avea ai le susuga Mase Mahonri Schwalger le faiaoga ulu o le ‘au taitoasefululima (15s) a le Manu Samoa.

O le vaega na maitau ai le mata’ina o le taumafai a le ‘au a le atunuu, o le mafai lea ona faato’ilaloina e le Manu Samoa o loo faatulaga mai o se ‘au Tier 2, le ‘au a Italia o loo pito i luga i faatulagaga o aulakapi poo le vaega ua ta’ua o le Tier 1.

E pei ona faamauina i se faatalanoaga a le alii faiaoga ulu ia Mase Mahonri Schwalger ma le kapeteni o le ‘au ia Theodore McFarland ma le aufaasalalau i le mae’a ai o le taaloga.

Na faasoa e Theodore McFarland, o Italia o se ‘au e matuai lelei lava, ma o le ala foi lea o le iai i le pito i luga o faatulagaga o aulakapi i le lalolagi, ma sa latou agai i totonu o le malae ma le mautinoa o le a faigata le latou iloiloga ma le ‘au tele a Italia peitai sa taumafai malosi tama taaalo, ma o lea na faaalia lava ina ua o latou sola ma le manumalo.

Sa faaalia ai foi lona mitamita tele i le mafai ona faatino lea vaega i laufanua o Samoa i le Apia Park i luma o aiga ma le mamalu o le autapua’i.

Ina ua fesiligia e le aufaasalalau le alii faiaoga ulu e tusa ai ma fuafuaga a lana ‘au sa faapena ona agai ai mo le faatinoina o le taaloga, na tali Mase, o uiga faaalia i le faatinoga o le taaloga i luga o le malae, poo le attitude, ma le tumau ai i vaega uma poo le consistancy na o latou galulue ai ma talanoa ai ma tama taaalo, o itu ia na toe faamanatu e Mase mo le ‘afa mulimuli o le taaloga.

Mo le silafia e mae’a le ‘afa muamua o le taaloga ma Italia o loo sili ‘ai o le ‘au asiasi atu ia Italia i le 18 ia Samoa e 12 o ‘ai, peitai na faate’ia le ‘au tele mai Europa ina ua toe maua ‘ai faaopoopo a le Manu.

I le mae’a ai o le taaloga na manumalo le Manu Samoa i ‘ai e 33 i le 25 a Italia.

Ua faamauina o alii na maua ai sikoa o le ‘au o Murphy Taramai, Nigel Ah Wong, Danny Toala ma Afa Moleli.

E lua kiki i le pou mo sikoa na ova ma le 3 o a’a o sala na sao mo le Manu Samoa lea na manumalo ai.

O le a faapena ona faasauni le ‘au a le atunuu e iloilo ma Sepania i le Aso Toonai, 13 o Iulai 2024.