Ua faamuta e le malo auaunaga a le Komiti Faafoe a le soifua maloloina, Health NZ Te Whatu Ora, ae aumai i totonu le Komesina.
O le Komesina ia Lester Levy o lea e lei leva ona tofia o le faatonusili peitai o lea o le a see atu nei i le nofoa o le Komesina mo le 12 masina.
O suiga nei na fofoga mai e le minisita o le soifua maloloina, Shane Reti faatasi ma le Palemia ia Christopher Luxon ananafi, ma le tala o le mafuaaga ua faamuta ai e le malo le komiti faafoe ona o le popolega i le soona faaalu o tupe pe a faatusa i le pa’ū maualalo o tupe maua.
E $1.4 piliona lea ua fai mai le minisita ia Reti o le gau a le soifua maloloina o loo agai atu iai i le faai’uga o le tausaga, ma o lipoti nei na fofoga ai le minisita i le masina o Mati o le tausaga lenei.
I totonu o le tasi le masina ua maitauina le atili pa’ū o lona tulaga, e pei ona iai le tusa ma le $130 miliona i le masina tupe ua ova faaaogā.
E ese mai suiga ua tuli ai e le malo le Komiti Faafoe a le soifua maloloina, o lea foi o le a vaevaeina i pulega e 4, ma e tofu lava le pulega ma le sui pule sili.
Ae mo le Komesina fou ua filifilia o le a ia lipoti agai i le minisita o le matagaluega i tala o le tupe.
Puna o Faamatalaga: ‘Turnaround’ job: Health NZ board sacked, commissioner appointed (1news.co.nz)
