Ua iloa nei nisi faamatalaga faaopoopo e faatatau i le pailate lea na maliu i le helicopter na lavea i Cairns ma aveina atu i talafou i le amataga o le vaiaso.
O le helicopter lea ua lipotia na aga’i ane i le malaga e lei faatagaina mai le nofoaga na iai le helicopter i le malaevaalele i Cairns i le taeao o le Aso Gafua o le vaiaso nei ma lavea ai i le taualuga o se faletalimalo i lea lava faaitu.
O le pailate o se alii Niu Sila e pei ona faailoa e le One News, o Blake Wilson sa nofo i Kuiniselani ma e 23 tausaga ma sa aumau muamua foi i Niu Sila nei.
Ua logoina lona aiga i le faalavelave ma faamaisega ua faaoo iai.
Na ta’ua i le lipoti e le sui o le Palmerston North Boys High School e moni sa a’oga Wilson i le a’oga lea i le 2018.
E maofa leoleo i le leai o se isi soifua na aafia i lenei faalavelave se’i vaganā si alii pailate.
Fai mai pe ā ma le 400 na aveesea mai le faletalimalo lea na aafia i le faalavelave.
O loo faaauau pea su’esu’ega.
Puna o Faamatalaga: https://www.1news.co.nz/2024/08/14/more-details-emerge-about-nz-pilot-in-fatal-cairns-chopper-crash/
