Ua oosi ese nei le igoa o le Ekalesia Aso Fitu Tutoatasi mai le lesitala o charities a Niu Sila mafua ona o le le lelei ona vaai o tupe ma oo ai I le gaoi
O lea ua lua tausaga o faia suesuega faasaga I le Samoan Independent Seventh Day Adventist poo le SISDAC, tauaofia ai ekalesia e sefulu I totonu o Aukilani
O le tausaga e 2013 na muai oo ai le ekalesia I le Serious Fraud Office, ma o suesuega nei na toso ai I le 2017 le sa avea ma teutupe, o ia foi o le alo tamaitai o le faafeagaiga – Elizabeth Papu I le 2 tausaga ma le 9 masina I le falepuipui ona o le gaoi, alu ai le silia ma le $1.6 miliona mai le lotu ma faaaoga I taaloga casino
Ae i le ripoti ua faalauiloa nei e le Charities Services pei ona ripotia e le leitio a Niu Sila, o loo maua ai tupe na alu ma le isi teutupe na iai muamua foi, Joseph Stowers e silia ma le $490,000
O le taitai o le SISDAC, Pastor Willie Papu o ia lea o loo taulamua I nei suesuega, pei foi ona ia tausolomua e sasaa atu le latalata I le $1 miliona I le OneCoin, ma le $1.7 miliona I le WFE Capital, ma o nei inivesi uma na lapataia e le Financial Markets Authority e ono taufaavalea, ma e tusa ma le lea ripoti o lea ua gau uma tupe a le SISDAC na inivesi iai
O loo sau ai foi I lea ripoti le tina na taulamua I le OneCoin, Sina Hunt, lea na alu ma le silia ma le $200,000
Tusa ma suesuega ua faalauiloa nei, o lea ua toe totogi atu e le faafeagaiga ia Papu agai I le SISDAC le $355,097 mo tupe ua gau I le WFE Capital
O le aso Faraile o le vaiaso talu ai, aso 5 o Fepuari lea na aveesea ai le igoa o le SISDAC mai le Charities Register, ma e le mafai ona toe talosaga e lesitala I totonu o le 6 masina, a’o le faafeagaiga ia Papu ma Joseph Stowers ua faaleaogaina o laua tofiga o ni sui ofisa o se charity, ma e tumau lea faasalaga mo le 4 tausaga O le taitai lenei o le SISDAC, na faatoese ai le pule sili o le TV1 a Samoa, Galumalemana Faiesea Lei Sam, ona o le faasalalauina o lana lauga na tuu ai I lalo isi talitonuga faapea le alii palemia I le tausaga talu ai, ma I’u ai ina le toe faasalalauina e le ofisa faasalalau
