O talinifo poo smart mouthguards ua avea ma mataupu o le a lē mou atu mo sina taimi, a o faapea ona faaauau iai felafolafoaiga ma manatu faaali, ae patino i le lē mautonu i tagata taaalo lakapi.

O le tama taalo i le ogatotonu o le laina i tua a le Chiefs ma le All Blacks o Anton Lienert-Brown, ua ia ofoina sona foi faalogona e uiga i le faamalosia o ia e alu i fafo i le taimi o le taaloga amata o le Supa Lakapi Pasifika i le Aso Faraile talu ai.

O Lienert-Brown, sa faatonu e alu i fafo ma le malae talu se faailoilo mai le talinifo atamai fou o le taamilosaga.

A o tasi le ‘ai o sili ai le Crusaders i le taimi o le vevela o le taaalo osofai a le Chiefs i le toe lima minute o le taaloga o totoe, sa logoina loa Lienert-Brown e sau i fafo ma le malae mo se faavasegana i aafiaga o lona ulu e mafua mai i se faailoilo mai i lea talinifo fou.

O lea talinifo atamai, e iai se tifa manifinifi – chip – i totonu e na te maitauina se malosi o se taia o le ulu i nifo, ma auina atu ai faamatalaga i le taimi lava lea e tauala atu i fesootaiga a le bluetooth, i fomai i autafa o le malae o loo mataituina le taaloga.

I luma atu o lea taaloga, o le loka a le Crusaders o Quinten Strange, sa ave foi i tua ma le malae i se tulaga tali tutusa faapea.

O le taimi lava sa mae’a ai le taaloga, sa lei toe faatali le kapeteni a le Crusaders ia Scott Barrett i lona faavasegaina o lea talinifo fou, ma atili sasaa ai le penisini i le afi o manatu faaalia.

E fā aso talu ona mae’a lea taaloga, ae faatoa faailoa se manatu o Lienert-Brown i le vevesi sa ave ai o ia i tua, ma ia vave faamanino ai lana tali i le mataupu ma lona tulaga o tu ai i lea talinifo.

Sa ia ta’ua ai i le aso, o lona ave i tua ma le taaloga sa mulimuli ane logo o ia, o aafiaga sa mafua ai lona tuua o le malae, e mafua mai i se taia o lona ulu są taia ai i se taimi muamua atu o le taaloga.

Ma ia ta’ua ai, ona o ia o se tagata e tauva, sa lei manao ai e alu i tua, ma sa lei mautonu foi pe aisea sa faatonu ai o ia e alu i fafo ma le malae i lea taimi, ae faatoa logoina o ia mulimuli ane, o le taia o lona ulu sa tupu i se taimi muamua atu o le taaloga.

Ae e ui lava i lea lē mautonu, ae ua manatu ia Lienert-Brown, o le pogai lena ua mafua ai lea auala o talinifo fou, e faailoa atu ai ia i latou pe afai ua pasi le laina o se aafiaga e tatau ai ona ave i fafo ma le malae.