O le a amata ona laeiina e le aufaigaluega a le Woolworths poo le Woolies ni meapueata e pipii i le tino, body cameras ona o le faatupulaia pea o le osofaia o le aufaigaluega a o faatino o latou tiute.

Ua faia lea faatatau i le mae’a o se faaaliga mai le Countdown o se tasi foi supamaketi ua oo atu i le 131 pasene le siitia o tagata faigaluega ua aafia i sauaga ma faaoogalima a o faia o latou tiute faalegaluega i totonu o le ono masina talu ai e faatusa atu i le taimi faapea i le tausaga talu ai. 

O nei amioga e aofia ai le feanu ane se’i tulou o tagata, tele o le mau igoa eseese e faaigoa ai nai tagata faigaluega ma unai’a solo ma ua lēlavā onosai foi le kamupani ona o ia ituaiga uiga. 

Fai mai se sui o le Woolies i le lipoti a le Newshub ua alagatatau ona faatino le tulaga lea i meapueata e pei ona ta’ua aemaise o lea ua aga atu foi i le vaitau pisi o faatauga.

Ua amata ai ma se campaign a le kamupani ua talosagaina ai le au faatau ma soo se tagata ia faaaloalogia le auaunaga a ia foi tagata a o sauni atu mo aso fiafia.

Fai mai e 45 miliona ua inivesi e le kamupani i le faamautuina o polokalame tau le saogalemu mo le aufaigaluega.