Ua toe afea foi le nofoaga o loo vaaia ma tausia ai fanau sauāina, le Campus of Hope i Tuanaimato i se isi meaalofa o le Kerisimasi, e ala i se foa’i tupe e sefulu afe, o taumafa ma isi oloa tāua ma aogā mo ia fanau a le atunuu.

O sui o le ekalesia Samoa Asofitu o le toe afio mai i le pitonuu o Punchbowl i Sini Ausetalia ua tauala mai ai lea agalelei, e pei ona latou afea ai le nofoaga i Tuanaimato ma feiloa’i atu i fanau sauāina o loo tausia ai, ma tauaao ai ma le latou foa’i.

Faaalia i se pepa o faamatalaga o tausaga uma e faia ai lea foa’i faasamaria agalelei a lea ekalesia i totonu lava o Ausetalia, peitai ua latou manatu e faia se suiga i lenei tausaga, ma aumai ai le foa’i mo le nofoaga o le Campus of Hope o loo i le vaaiga a le Toomaga mo ē Puapuagatia.

O suegatupe e ala i fale’aiga o taumafa e pei o le BBQ ma isi sa’iliga na maua ai le seleni ua faia ai le foa’i tupe ma faatau ai oloa e pei o taumafa ua momoli atu foi mo le nofoaga o loo tausia ma vaaia ai fanau ua sauāina.

Ua ave ai le faafetai a le Pelesetene o le Toomaga ma i latou uma o galulue i le vaaia o ia fanau, i le agalelei o lea ekalesia mai Ausetalia.