O le faatupeina o a’oa’oga a alo ma fanau a Samoa i le Iunivesite Aoao a le atunuu e lē taugofie, ma o nisi o fanau o loo fesoasoani tupe o le poloketi miliona i le totogiina o o latou pili.
Peita’i o nisi o fanau o loo maua le fesoasoani mai Samaria agalelei e pei o le Malo o Iapani ua tauala mai i le faalapotopotoga faavae o le Yasaki Kizuna Foundation le faatupeina o matāupu o loo a’oa’oina ai i totonu o le iunivesite.
E to’a 24 nei fanau e aofia ai le to’aiva o loo su’eina le faailoga Bachelor, to’alima o fanau o postgraduate students, to’afā o loo su’eina le faailoga o le Master, to’atasi o loo su’eina le faailoga o le PHD ma le to’alima o fanau o loo a’o’oga i le vasega o le tausaga faavae poo le foundation.
O le sui o le Malo o Iapani ma le sui o le Yasaki Kizuna Foundation na auai i se sauniga na faailoa ai lea fesoasoani, lea sa molimoli ai ma le faafetai a le Pule Sili o le Iunivesite Aoao o Samoa i le agalelei o lea faalapotopotoga mai le kamupani o le Yasaki sa pito to’atele o tatou tagata sa faigaluega ai i tausaga ua tuana’i a o faagaioia lea kamupani i Samoa.
