Ua amata mai i le motu i Sasa’e se’ia pā’ia le motu i Sisifo le patipatia ai e o tatou tagata Samoa o matāti’a ua mafai ona ausia e ana tamafanau e lē gata i taaloga faapolofesa o le lakapi Amerika, le National Football League (NFL) ae faapea foi i le itu tau faafiafiaga.
O lenei matāti’a ua molimauina le mua’i filifilia ai i le vaega muamua poo le Round 1 o le NFL Draft mo le tausaga 2026.
O se vaaiga ua manino mai ai foi le maualuga o le fiafiaga ua iai tagata Pasefika aemaise o Samoa i le taaloga o le football.
O nei alo o Samoa e aofia ai Francis Mauigoa, o loo i le vaega ua ta’ua o le offensive tackle mai Miami, ma o ia e lona sefulu iai le vaega na filifilia e le New York Giants.
O le isi alii na sosoo ai i le ‘au filifilia o Spencer Fano o le vaega foi o le offensive line mo le ‘au a le Cleveland Browns, ma le alii o Olaivavega Ioane mo le ‘au tele a le Baltimore Ravens, o se tagata ua iloga i le offense guard mai le Setete o Pennsylvania.
Ae i itu o faafiafiaga poo entertainment, e to’alua ni alii Samoa, o se auuso ua vāvāō ai luga o upega tafa’ilagi i le mata’ina o a la’ua foi taumafaiga.
O ia alo o le atunuu e suafa ia Rich ma Tone Talauega, ma o i la’ua nei na ta’imua i le a’oa’oina o Jaafar Jackson o taga ma gaioiga a le alii pese ta’uta’ua o Michael Jackson.
O galuega na faia i le tuufaatasia ai o se ata tifaga o le tala’aga o le soifuaga o Michael ma ana taumafaiga i le itu tau musika a o soifua mai poo lana biopic.
O Rich ma Tone ua leva ona tautua i lenei itu o faafiafiaga, ma i talaaga na mafai ona galulue faatasi nei alii ma Michael a o talavou i la’ua ma e tele koneseti tetele na sisiva faatasi ai ma le alii pese lauiloa.
O le agaga mitamita o le mafai ona faaaogāina pea o la agavaa e faatinoina ai se galuega maoa’e ma le maualuga i le a’oa’oina o i latou o le ata tifaga aemaise ai le alo o Jermaine Jackson le alii o Jaafar Jackson.
O lea ua amata faaali i fale tifaga le ata ua faaigoaina “Michael”.
