Ua lē toe maua e le patī faaupufai e puipuia aiā tatau a tagata le nofoa o Vaimauga 3 na manumalo ai i le palota tele ia Aokuso o le tausaga ua mavae, e faapena foi ona lē manuia le sui na tauva mo le vaega faaupufai o le Faatuatua i le Atua Samoa ua Tasi, ae ua toe tusi aao le itumalo palota i le afioga Lautimuia Uelese Vaai sa seei i le nofoa o Vaimauga 3 i le paeaiga 17 a le Palemene, lea sa tauva faatuto’atasi.
O le taunuuga lea o le palota laitiiti a Vaimauga 3 i le Aso Faraile ua mavae na māfua ina faamavae lē sa tauaveina le nofoa ina ua iai lona finagalo e faamavae ma le vaega e puipuia aiā tatau a tagata, ae lagolago i le Faatuatua i le Atua Samoa ua Tasi.
I le mae’a o le faitauga aloa’ia i le Aso Toonai na faailoa lautele ai e le Komesina o faigāpalota le taunuuga aloa’ia o lea faiga filifiliga lea e 1,802 palota ua manumalo ai Lautimuia Uelese Vaai, 996 palota na maua e lē sa tauaveina le tofi faipule o le itumalo le afioga Taioaliiseu Fiti Aimaasu, e 573 palota na maua e le sui tauva o le HRPP le tofa Tuuamaalii Tupuola Fomai Sapolu, ae 474 palota na maua e le tasi o sui tauva tuto’atasi letofa Puaalatamai Tupuola Filemoni Filemoni.
E 806 palota ua manumalo ai le sui tauva tuto’atasi le afioga Lautimuia Uelese Vaai faatusa i le 996 o palota na maua e le sui tauva o le Faatuatua i le Atua Samoa ua tasi le afioga Taioaliiseu Fiti Aimaasu.
O le tau faai’ui’uga o le masina lenei o Me e tauaofia ai le Palemene lea o le a faatauto ai ma le sui ua filifilia i le nofoa o Vaimauga 3, o se tamalii sa avea ma minisita o le Kapeneta i le faigāmalo muamua a le Faatuatua i le Atua Samoa ua Tasi.
I le mae’a ai o le palota laitiiti a Vaimauga 3, o loo tālia nei se aso e faailoa ai le palota laitiiti a Safata 1 o se tasi o itumalo palota ua faamavae lo latou sui faipule ma le vaega faaupufai e puipuia aiā tatau a tagata ona ua suia lana lagolago i le itu faaupufai o loo tu nei i le foe o le pulega o le malo.
