I le saoasaoa o le faaaogāina e le lalolagi o fesoota’iga faatekonolosi, i lenei vaiaso ua faagasolo ai i Samoa se a’oa’oga e faatalanoa ma fetufaa’i ai auala e taula’i i le saogalemu o le faaaogāina o ia fesoota’iga o loo faaaogā ai le initaneti.
O le Matāgaluega o Leoleo, Falepuipui ma le Toe Fuata’ina ua taulamua i le tuufaatasia o lea a’oa’oga, ma o loo auai mai ai sui o atunuu o le Pasefika ae lagolago iai le auaunaga faaleoleo a le malo o Ausetalia, le Australian Federal Police.
Ua to’atele tagata ua feagai ma aafiaga ona o le faaaogāina o fesoota’iga faatekonolosi ma o le tāua lea o le faatalanoa o auala e tausia ai le saogalemu o le faaaogāina o ia fesoota’iga televavave faaonaponei.
O le afioga i le Palemia na saunoa e tatala lea faatasiga i le afiafi o le Aso Sa lea ua soosoo tau’au ai le Matāgaluega o Leoleo, Falepuipui ma le Toe Fuata’ina ma le ekalesia Hossanah i Samoa.
Le afioga i le palemia i se vaega o lana saunoaga na tatala ai le vaiaso o a’oa’oga ma faatalanoaga i le tāua o le saogalemu o le faaaogāina o fesoota’iga faatekonolosi ua faaigoaina o le Cyber Safety Pasefika.
