E to’a 27 tagata mai le Atu Kuki ua aafia i se faiga taufaasese i le facebook e faaaogā ai le AI ma isi faiga faatekonolosi ma ua ma’umau ai tupe e silia i le 16 afe.
O lea faiga taufaavalea i luga o upega tafa’ilagi e faaigoa o le Advanced Fee Fraud na maua i su’esu’ega a le Cook Islands Financial Intelligence Unit galulue faatasi ai ma le Bankers Association ma leoleo a le Atu Kuki.
Fai mai le RNZ e to’alua nisi o loo māta’itūina ma feta’ua’ina i le matāupu lea ma o loo faia iai su’esu’ega.
Faamaonia e le au su’esu’e e $16 afe ma ona tupu na maua ane mai tupe na teuina e i latou na aafia i faiga taufaasese nei i se account i se faletupe i le atunuu, ua faaliliu i le cryptocurrency ma lafo ese i isi account i fafo ane o le atunuu.
O lea faiga taufaavalea e aofia ai faasalalauga i le facebook e folafola mai ai tupe tetele e maua i inivesi ma nonōgatupe faapea meaalofa tau le komiuniti ae fiu e tatali e leai se tupe e toe foi ane.
Puna o Faamatalaga: https://www.rnz.co.nz/news/pacific_cook-islands/594182/cook-islanders-targeted-in-16-000-facebook-advanced-fee-scam
