A o feagai le lalolagi i lenei taimi ma tulaga faigatā i le sii o le tau o oloa tau suāuu ma penisini, o lea ua iai se finagalo o le malo e taofia le utuina o vaalele ma vaa o le sami e afea Samoa aemaise lava vaalele ma vaa o le sami e afea le atunuu ona o le fia maua o lea malosi’aga.
Ua faaailoa e le matāgaluega o tupe a le malo talu ai nei le lava pea o lea oloa mo le faaaogāina e pei ona afea ai e vaa suāuu le atunuu i masina ua tuana’i faapea se isi vaa suāuu o loo faatulaga e taunuu i le masina fou o Iuni.
O le masina lenei o Me ua faamauina le maualuga ese ai o le tau o lea oloa i le atunuu e pei ona oo le tau o le suāuu kiso i le 4 tālā 50 sene i le lita, o le penisini e 3 tālā 51 sene i le lita ma le kalasini ua 4 tālā 5 sene i le lita.
I le fono ma tusitala talu ona toe taliu i fanua le siiga gasegase a le ta’ita’i o le malo, ua faailoa e le Palemia susuga Laaulialemalietoa Leuatea Polataivao Fosi e lē mafai ona ‘alofia le tulaga ua iai nei le lalolagi i le tau o le suāuu ma afai ae sii le tau e aumai ai o le a faapena foi ona sii le tau o lea oloa i Samoa.
Ua silasila ai nei le malo e toe iloilo le tau o le totogi o pasese mo taavale laiti la’upasese ma pasi o loo femalagaa’i ai le atunuu lautele.
Se finagalo o le afioga i le Palemia i le feiloa’iga ma tusitala.
