O le BG Wealth o le igoa lea o se taumafaiga ua latou faia ni a’oa’oga ma faatino ni faalauiloa e tosoa’ina atu ai tagata e auai ma le faamoemoe e faagaioia ai ma se faiga taufaavalea e pei ona faailoa e le Faletupe Tutotonu o Samoa e avatu ai seleni a tagata i se faiga e faafaigaluega ma le faamoemoe e faaopoopoina ai ni faamanuiaga tau tupe e maua.
I se faasalalauga faalaua’itele mai le Faletupe Tutotonu i lenei vaiaso ua lapata’ia ai tagata i Samoa ina ia mataala i lea gaioiga a le BG Wealth e pei ona faaigoa ai lea taumafaiga, ona o loo latou una’ia le tuuina atu o tupe e faafaigaluega ma le folafolaga e tele nisi seleni e maua ai.
E una’ia foi tagata e sa’ili isi tagata e auai ma avea ma paaga e faateleina ai tagata e fefaataua’i tupe ma maua ai ni faasiliga o seleni latou te maua.
E pei ona silafia ua lē tasi ae atulasi gaioiga faapea ua lapata’ia mai ai lea faletupe o loo māta’itūina gaioiga faasolitulafono faapisinisi e faaaogā ai e nisi tagata auala eleelea e sa’ili ai a latou tupe.
E iai gaioiga faapea i ni tausaga ua tuana’i na gaugau ai nisi o pisinisi ma tagata ta’ito’atasi ma ua lē toe maua ai lava a latou seleni na ave e faafaigaluega ai.
