Ua iai nei se tasi o auaunaga fou i Samoa o le a faaaogā ai auala o tekonolosi faaonaponei e teu ma tala ai tupe ae faaaogā ai le card.
Ua ta’ua lea faiga o le “PacWallex” ma le “TickTap Card”.
Ua faailoa faalaua’itele mai e le faletupe tutotonu o Samoa lea auaunaga fou ina ua faia lana faai’uga e talia lea auaunaga ona ua mautinoa e saogalemū ma ua faamalieina foi aiaiga o tulafono a le faletupe tutotonu.
O se tautua ua faailoa e lea faletupe o le malo, a teu iai seleni e mafai ona totogi ai pili poo isi auaunaga mana’omia.
O se tulaga faata’ita’i poo se trial ua amata faagaioi ai lea auaunaga fou e pei ona sa amata i le Aso Gafua o le vaiaso nei le aso 4 o Me ae mae’a i le aso 3 o Fepuari o le tausaga fou 2027.
O le faagaioia i le taimi nei o lea tautua ua faaalia e lea faletupe i se pepa o faamatalaga, o loo māta’itū lelei ina ia mulimulita’ia ala faaletulafono.
O le laisene ua faagaioia ai e le’i tuuina atu atoatoa i le kamupani e ana lea auaunaga fou se’ia vaganā ua mae’a le iva masina o loo faatino ai i se tulaga o se trial pe o le faata’ita’i.
