O le aso 20 o Me ua faatulaga e le Faamasinoga Faaitumalo e amata ai ona su’esu’e molimau o le tagi o loo molia ai sui faasalalau e to’alua o le polokalame a le maota o viiga i Sini Ausetalia.
Peita’i e muamua ona tagofia i le aso 14 o le masina nei lava le talosaga a le loia o loo tula’i mo ia sui faasalalau lea ua finau ai e taofia le su’esu’eina o moliaga poo le strike out motion.
O le aso foi lea e su’esu’e ai le talosaga a le itu a leoleo ina ia avatu se faatagaga a le faamasinoga e faaaogā ai fesoota’iga i upega tafa’ilagi e faia mai ai i Niu Sila le molimau a lē ua tagi.
O le valaauga o le matāupu tau faamasinoga lenei i le Aso Faraile ua mavae na lē talia ai le talosaga a le tama’ita’i loia o Leone Su’a e faasee ese ma le finauina o moliaga ona ua silasila le faamasinoga, ua fai si umi o ia tauave le tagi a leoleo ma ua lē talafeagai ona faia se isi suiga.
O sui faasalalau o loo molia o loo iai le faatagaga a le faamasinoga e malaga i Ausetalia mo nisi o fuafuaga tāua ma le aiaiga e toe malaga mai i Samoa i le aso e su’esu’eina ai moliaga o le faia o ni faasalalauga taufaaleaga e faaaogā ai auala o fesoota’iga faatekonolosi.
