Ua faamaonia nei e le Faamasinoga Faaitumalo o Waitākere moliaga o se alii avepasi, i moliaga o le faaoolima matagā i se tama’ita’i a’oga.
O lē ua molia e suafa ia Kartik Kamiesh Kumar e 46 tausaga le matua, ma e faamauina i ripoti o se tagatānuu Initia.
Ta’ua i ripoti a le leitio faavaomalo a Niu Sila, o lenei matāupu na tula’i mai i se tasi o afiafi a o taumafai lē ua aafia e aga’i i le nofoaga o loo faamautū ai o ia i Aukilani i Sisifo (West Auckland) i le tausaga ua tuana’i.
Na fofogaina i luma o le faamasinoga lea matāupu, ma e faapea, o le mae’a ai o vasega a sia mafine sa faatino i le taulaga i Aukilani lea na ia aga’i loa i luga o le pasi e malaga atu mo lona fale.
Faamatala e na o ia lava le pasese sa iai ma o lea na pei na amata ai loa ona talatalanoa atu lē ua molia ia te ia, ma na ta’ua e le tama’ita’i a’oga, ua amata ona ese ona faalogona talu ai ua tauāu ina sosopo faamatalaga a lenei alii.
Na taumafai lea mafine e alu ese mai le pasi ina ua tū ae taofi e le alii o Kartik, na ia lokaina faitoto’a o le pasi.
I faamatalaga a le tama’ita’i a’oga, ua oo ia te ia le fefe ma le pala’ai ona ua lē tatalaina e le alii avepasi le faitoto’a, ma o lona fefe tele lea na ia ioe ai i le alii o Kartik i lona faatauanau atu pe mafai ona ia sogi ia te ia i lona lima.
O le taimi foi lea na ese ai loa gaioiga a lē ua molia na fai i sia mafine.
O le maua o lona avanoa e alu ese ai mai le pasi lea na ia logoina ai loa leoleo i le mea ua tupu.
I le tuuina mai o le faai’uga a le faamasino, Judge Terry Singh, na ia faailoa ai le lilifa o ona manatu ma lana faai’uga i le molimau a le tama’ita’i a’oga faapea foi faamaumauga tuuina atu o ata pu’e a le CCTV.
Faaopoopo Singh o gaioiga Kartik na faia lava ma le mautinoa, ona o lea lava na faamaonia uma vaega o lona tapē ai o moli o le pasi ina ia ‘aua nei maua atu ai e mea pu’e ata ana faiga.
Na teena e le alii o Kartik Kamiesh Kumar ona moliaga, ona na ia faapea e leai se mea na tupu, ae na o lona uu mai o le lima o le tama’ita’i ona na ia masalomia le tama’ita’i o taumafai e gaoi se mea mai i luga o le pasi.
O loo tālia nei le faasalaga o lenei tagata, ae ua faamauina le tuuina atu o le talosaga a le loia a lenei alii mo le faamauina o le moliaga ae lē faamaonia, ona o ni aafiaga e oo iai le iai o lea tagatānuu i totonu o Niu Sila.
O le masina fou o le a toe faatino ai taualumaga o lenei faamasinoga, e iloa ai poo le a tuuina mai se faasalaga mai le faamasino poo le faia o le matāupu o le talosaga ua tuuina atu e loia a Kartik Kamiesh Kumar.
Puna o Faamatalaga: https://www.rnz.co.nz/news/crime-and-justice/594362/auckland-bus-driver-found-guilty-of-trapping-student-on-bus-indecently-assaulting-her
