O le molimau lona tolu i le lisi o molimau e silia i le 20 a leoleo na tula’i i le taeao analeila, o le faletua o lē ua maliu ia Epifania Ualesi.
O le faalavelave na tupu i le po o le Aso Sa 21 o Iulai 2024, ae mulimuli ane ai i le aso na sosoo ai, na faaoo ai foi e lē ua molia nei le maliu i le alii leoleo ia Peniamina Perite.
O le mau a Epifania e faalua ona faaoolima Pokati i lona toalua i le po lea.
O le tinā ia Epifania sa nonofo muamua ma lē ua molia, na ia faailoa i le faamasinoga, sa ia tuua le la mafutaga ma alu ese ina ua mae’a ona ia faailoa i lē ua molia la te lē toe nonofo.
Na ia ta’ua ua fiu i uiga o lē ua molia i sauāga na māfua ai ona la tete’a ma alu ese, peita’i e le’i iloa e lē ua molia o ia lea ua nonofo ma Lafaele o lona to’alua ua maliu.
O le po lea na ia faamatala ai, na uma le mea’ai a lo latou aiga i Nofoalii i le afiafi ona alu lea o Lafaele i luma i le isi fale e piliati ai.
O le foi mai o lē ua maliu i lo la fale ma susu’e le ta’inamu o le a mālōlō ae pa loa ma le laaumalosi.
Na ia vaaia le solovi lemū ifo o lē ua maliu, e pau le upu na ia faalogo iai o faapea atu ia te ia, ”Ave le tama ma o i tua”.
Sa ia ta’ua na oo atu Pokati i totonu o le fale ma fai atu ia te ia pe mana’o e fana o ia; sa ia aioi iai e leai faamolemole, ma na ia ta’ua foi le ta ai e lē ua molia o ia i le laaumalosi.
O le molimau a Epifania e faapea na tuua e Pokati le fale ma aga’i i fafo ae na toe oo atu ma le agaese ma faaoo ai manu’a i lē ua maliu.
O le matāupu lenei o loo masalomia na afua ai foi le maliu o le alii leoleo ia Peniamina ina ua mae’a i le po le faalavelave ma aga’i mai ai leoleo i Fasitoouta e sa’ili lē ua molia ae tupu ai loa le faalavelave o loo masalomia na faaoo ai fo’i e lē ua molia le oti i le alii leoleo e faaaogāina ai le laaumalosi.
O loo te’ena e Pokati Tu’u ona moliaga.
O loo faagasolo mo le lua vaiaso lea matāupu i le Faamasinoga Maualuga i Mulinuu.
O le Afioga i le tamaita’i Faamasino ia Leutele Mata Tuatagaloa o loo faatautaia, faapea ai le laulau a Faatonu o le Faamasinoga.
O loo tula’i le tamaita’i Loia ia Lucy Marie Sio Ofoia mo le itu a leoleo i le matāupu ae o Maposua Tanya Toailoa o loo tula’i mai mo le itu tetee.
