Ua ioeina e se alii Aukilani lona faaleagaina o taavale a leoleo, e ala i lona soso’aina faalausosoo o taavale, ma lona faia o gaioiga taufaamata’u ma ia faailoa o le a ia tafanaina uma malu o le malo a o faatino ai e leoleo lo latou galuega o le saisai ma taofia lenei alii i Hamilton i le tausaga talu ai.
Na ioeina e le alii o Jakeem Bowman-Fenton ona moliaga, e aofia ai lona faaleoina o se faamata’u e fasiotia ai poo le faaooina ai o manu’a ogaoga i le tino o soo se tagata, o le faaoolima e faaaogāina ai se taavale o se ‘au’upega, o lona aveina faasolitulafono o se taavale, o le tetee i le taofia ma le saisai faapagota ai o ia, o le aveina o se taavale e aunoa ma se faatagaga, ma lona umiaina o se laau na masalomia e leoleo o se laaumalosi.
I ripoti ma faamatalaga mai le NewsTalk ZB na faailoa ai, sa fofogaina i luma o le faamasinoga tulaga uma o le matāupu a lenei alii e 30 tausaga le matua.
Māua ai sa amata mai lona ave faagaoi o se taavale i le itu auala o Ohaupo Road i le aso 31 o Oketopa.
E faapea ina ua ia vaaia se taavale a leoleo, o lea na ia toe liliu ai le taavale ma ssoso’a le sā a malu o le malo, ma e faapea e faalausosoo lava o ia soso’aina lea taavale a leoleo, a o iai ni malu o le malo e to’alua i totonu o le taavale.
Na taumafai leoleo e aga’i ese, peita’i na tuliloa atu lava e Jakeem le taavale ma toe soso’a, o lea na ia sola ese loa mai le taavale, ae tamo’e agai i nisi o faaitu o Bader i Hamilton.
Ta’ua i ripoti, i le taimi na faatino ai e leoleo a latou galuega o le saisai faapagota mai o ia, o i lea na faalālā a’e ai loa e Jakeem i leoleo se ‘ofe, i lena taimi na masalomia o se laau malosi, talu ai faiga a le alii o Jakeem, i lona valaau ane o loo ia umia se fana.
E tusa ai ma lenei matāupu, e faapea o lenei alii e 30 tausaga le matua, o se alo e faasino e tasi o tama’ita’i talavou na molia ma faamaonia lona fasioti tagata i le tausaga e 1999.
E to’atolu tama’ita’i talavou na aafia i lenei matāupu i le tausaga 1999, na molia ma faamaonia moliaga o le fasioti tagata ma le loto iai (murder) i le maliu ai o se alii Aukilani e suafa ia Raymond Mullins.
E faamauina le mata’utia ma le ogaoga o aafiaga o lē ua maliu i lea matāupu; e faapea na tatui se’i tulou, faaoolima ia te ia i se samala ma le tele o vaega o meāfale.
Faamanino o se tasi lenei matāupu na matua’i maofa ai le atunuu atoa ona o le mata’utia o faaoogalima na faia e ia tama’ita’i.
Ae ina ua fesiligia i latou i le mea na tupu, na pau le latou tala, sa o latou taumafai e fo’ia gaioiga a le alii o Raymond Mullins, poo le self-defence.
Peita’i i se taimi mulimuli ane, na māua ai sa iai ni taupulepulega a i latou nei e gaoi le fale a lē ua maliu, a o le’i faaoo le oti i lea tagata.
O loo taofia pea i lalo o le vaavaaiga a leoleo Jakeem Bowman-Fenton ma o le masina o Aokuso o le a tuuina mai ai le faasalaga o lenei alii.
Puna o Faamatalaga: https://www.newstalkzb.co.nz/news/national/murderer-s-son-jakeem-bowman-fenton-repeatedly-rams-patrol-car-then-threatens-to-shoot-officers/
