Ua faamaonia mai e sui o le puleganuu a Ueligitone e lata lava i le 40 fale o aiga ma nofoaga ua lē mafai ona toe nofoia ona o aafiaga mata’utia na iai lea faaitu i timuga ma lōlōga tetele.
Ta’ua e le sooupu o le puleganuu, Richard MacLean e tolu ni fale o loo tu lalata i le nuu o Vogelmorn ua tuu iai le fautuaga o le lē saogalemū ona toe uia, ua faalegaina uma mai ni eleele solo.
I ripoti mai le leitio faavaomalo a Niu Sila, na faamauina ai le galulue faipaaga o le Wellington City Mission ma le puleganuu e fesoasoani atu i aiga e 40 ma tagata ua aafia, e sa’ili ni fale e nonofo ai mo lenei taimi e pei ona iai faletalimalo, e malu ma mapu atu iai i le taimi na tula’i mai ai aafiaga loulouā o le tau.
Fai mai a ia, o le vaega o le City Mission foi lea na faafesoota’i iai tagata mo ni fesoasoani tau tupe poo Emergency Relief funds.
Ta’ua e MacLean, e to’atele i latou o loo mafai ona fesoasoani ma tali atu iai le vaega a le inisiua, peita’i o loo iai lava lo latou talitonuga o le to’atele o aiga ma pisinisi ua matua’i aafia lava ma lē a’ua’u le faasoa e faatino ai tapenaga ma mea toe faaleleia, ma ua fautuaina lava i latou o loo moomia le fesoasoani ina ia faafesoota’i atu.
O nisi o galuega a le faalapotopotoga ua faamanino ai le tufatufaina atu o le 500-700 o tone o tagapepa poo flood waste bags mo tapenaga ma tuu iai otaota o mea na faaleagaina.
Ua iai foi le galuega ofo fua e aoina uma ai ato poo tagapepa nei ma nisi o otaota mamafa.
Faaalia e ono oo atu lava i le vaiaso fou le faataamiloga o lenei galuega.
Na faaopoopo mai le sooupu, o lea ua mae’a le taimi o le tali atu i taimi o faalavelave tutupu faafuase’i ae o lenei ua aga’i Ueligitone e toe faaleleia ma toe poupou ona aai.
E ui i lea itu ae o loo tatala pea le vaega o auaunaga o faalavelave tutupu faafuase’i Emergency Operations centre e fesoasoani atu i galuega o loo faia nei.
Puna o Faamatalaga: https://www.rnz.co.nz/news/emergency/593750/about-40-wellington-properties-uninhabitable-after-floods
