E lima ni matāupu ua amata faasolo ai nei su’esu’ega a leoleo i totonu o Aukilani, o ni faaoogalima na tula’i mai i le masina o Mati.
Ta’ua i faamatalaga ma ripoti mai le leitio faavaomalo a Niu Sila, o ia matāupu e aafia uma ai ni tupulaga talavou, o ē na faatinoina lea soligatulafono, o ē na aafia faapea ma se ulugalii.
O le mea mata’utia o ni matāupu o loo faamauina le pu’e ma tuuina atu i luga o upega tafa’ilagi.
Ta’ua o nisi o faaoogalima na tula’i mai i nofoaga faitele, māua ai le faatino e ni tupulaga talavou aga’i i se tasi tagata.
Faailoa foi o se faufauga faasaga i lē ua aafia (targeted).
Faamauina e leoleo e ui e lē o maua tonu ni faamaumauga i le tulaga o le maualuga ma le faaitiitia ai o le numera o nei matāupu, ae o se vaega ua faatupula’ia ai o ia ituaiga faalavelave ma soligatulafono.
Faamaonia e le auaunaga o loo latou iloa le tele o ata pu’e ua salalau solo i luga o upega tafa’ilagi, pe ā ma le lua ni matāupu i vaega eseese o Aukilani.
Faailoa poo le ogatotonu o le masina talu ai na maitauina ai le faaoolima o ni tupulaga i se isi o talavou i le matāfaga i Devonport.
Ta’ua o se taimi o lenei masina o le a tūtūla’i ai nei tupulaga talavou i luma o le faamasinoga e tali i moliaga o le faaoolima ma le faamoemoe e faamanu’alia se isi (assault with intent to injure).
Ua faamaonia mai e leoleo lo latou galulue ai e sa’ili isi o loo aafia i nei matāupu.
Ta’ua foi e sui o le auaunaga lo latou fautuaina ai o tagata lautele ina ia aua ne’i taumafai e faia le gaioiga o le faasalalauina atu o nei ata pu’e.
O le vaiaso talu ai foi na lipotia atu ai i leoleo se isi foi o matāupu, o ni tupulaga talavou na faaoolima foi i se tagata i fafo atu lava o se fale’aiga i Whangaparaoa Road i Stanmore Bay.
Ma o loo faasolo nei sa’ili’iliga.
Puna o Faamatalaga: https://www.rnz.co.nz/news/crime-and-justice/593021/another-level-of-worrying-violent-attacks-being-planned-and-filmed-for-online-content
