Ua talia le talosaga e faasee atu ai i le Faamasinoga o Apili le matāupu i le tagi a le Faipule o Falealili Tasi, le Afioga Toelupe Maoi’autele Poumulinuku Onesemo e faatatau i le aafiaga o ana aiā tatau.
O loo faia pea talanoaga pe o le ā tonu le matāupu e faasee atu i le Faamasinoga o Apili e faia iai la latou su’esu’ega.
O le aso 25 o Me 2026 o le a faia ai foi le isi fonotaga i le Faamasinoga Maualuga e faamautū ai nisi o matāupu.
Ua faaalia foi le tuuina atu ai o le faamatalaga a Tuiloma Lameko e faailoa ai i le Faamasinoga lona lē fia auai i le matāupu lenei e tusa ai o le tagi a Toelupe.
O itu Faamasinoga sa auai o le itu a Toelupe o loo tula’i ai le tama’ita’i loia ia Muriel Lui mai Samoa nei ma le alii loia papalagi mai fafo.
O le Afioga Su’a Hellene Wallwork o loo faatasi ma Honourable Christopher Finlayson.
O le talanoaga i le Aso Faraile e to’alua faamasino sa faatautaia ma sa faaaogāina le fesoota’iga i le video link e faatautai ai taualumaga o lea matāupu i le Faamasinoga Maualuga.
Na tolopō mai le matāupu lenei se’ia iloilo i le Faamasinoga le talosaga a Onesemo e tuuina atu lana matāupu i le Faamasinoga o Apili.
O le avanoa foi lea sa tuuina atu e le Faamasinoga i lana loia mai fafo ia Peter Lithgow i lea taimi se’ia tapena lelei mai ai ana finauga e faatatau i le talosaga a Onesemo.
Mulimuli ane ai faailoa i le faamasinoga e Onesemo ua lē toe mana’o e talanoa ma Lithgow i lana matāupu ona e ese ana fautuaga faaletulafono.
Ma o lona faamoemoega e toe sa’ili se isi ana loia mai fafo.
O lea lava foi taimi sa sa’ili atu ai lava Onesemo mo se avanoa e tolopō ai pea lana matāupu.
E le’i taliaina e le Faamasinoga lea tulaga, ona o loo faaalia i minute a le Faamasinoga na tuuina mai, o loo silafia lelei e lē ua talosaga taimi ma aso ua mae’a faatulaga atu e le Faamasinoga o lana matāupu ma ua mae’a aveina foi le avanoa muamua lea na tolopō ai.
E ese mai ai le talanoaina o lana matāupu lenei pe tuuina atu i le Faamasinoga o Apili, lea sa fuafua e faia i le Faamasinoga i le aso 29 o Aperila.
O le aso foi lea sa tuu atu iai se’ia tilotilo foi le Faamasinoga pe o faamalosia pea le poloa’iga o le faataatia ese o le Faai’uga a le Faamasinoga o Palota lea sa tuuina atu e le Faamasino Sili se’ia tālia lana matāupu e faapea ua aafia ana aiā tatau.
O le aso 3 ma le aso 4 o Iuni o le tausaga nei ua faatulaga e su’esu’e ai le mataupu autū e faatatau i le tagi a le faipule o Falealili 1 i le Faamasinoga.
