Ua tusiaao nei le Komiti Faatonu o le pulega o a’oga a le Malisi i Samoa, e tofia se alii Fiti o se faia’oga e avea ma pule fou e faauluulu iai le a’oga tulagalua a le Malisi o loo i Mulivai i Apia.
O lea tagatānuu o Fiti e pei ona faailoa i se pepa o faamatalaga, ua 25 tausaga o galue i le atina’e o a’oa’oga a le Malisi ma o loo avea nei ma pule o se tasi o aoga tulagalua a le Ekalesia Katoliko i lea atunuu, le aoga tulagalua lea a Sagato Maselino poo St Marcellin i Suva i Fiti.
Ua faailoa e le ta’ita’ifono o le Komiti Faatonu a le Malisi i Samoa le afioga Tuatagaloa Aumua Ming Leung Wai, o le filifilia o le susuga Joeli Koroiravudi o se filifiliga talafeagai ua faia e le komiti ona e iai ona tomai ma silafia i le agaga poo le sipili faa-Malisi e faatino ai a’oa’oga.
O le a suitulaga o ia i le susuga i le alii Felela o Brother Siaosi Ioane, ua 9 tausaga o avea ma pule o le a’oga a le Malisi i Mulivai ma e telē lona sao i le siitia ai o a’oa’oga a le fanau o loo a’o’oga ai.
O le a see atu le susuga i le alii felela e faauluulu iai le Ituaiga o Felela Malisi i Samoa ma ana galuega.
O le masina o Iulai o le tausaga nei e amata ai le alii pulea’oga fou i lona tofiga, ma o le a malaga mai ma lona to’alua ma nisi o ona alo laiti e faamautū i Samoa ma tauave lona valaauina.
