O le iai o le ofisa o le malo o Farani i Samoa lea e le’i leva ona tatala ma faamautū ai i Samoa le sui o lea malo, o se tasi lea o avanoa ua saga faamautū atili ai sootaga faavaomalo ma lo tatou malo ma faaauau ai ona fesoasoani le malo o Farani i nisi o poloketi o loo tuusa’o iai ana fesoasoani tau tupe.
O le afea o Samoa e le sui o lea malo o le faatonu o galuega a Farani i le Pasefika sa feiloa’i ai ma le Sui Palemia mfa nisi o ofisa sinia o le malo o Samoa e faaauau ai pea lea faigāpaaga.
O le faalapotopotoga foi o le si’osi’omaga o le Pasefika le SPREP o lona ofisa tutotonu o loo i Samoa sa afea e lea sui o le malo o Farani le tama’ita’i o Safia Ibrahim ma lana aumalaga.
O lea faalapotopotoga o loo ia maua le fesoasoani tau tupe a lea malo e tusa ma le 23 miliona tala mo galuega o atina’e gafataulimaina ma poloketi e fesoota’i i suiga o le tau ma otaota lafoa’i.
O loo maua foi e le SPREP nisi o fesoasoani tupe a Farani mo poloketi e faasino i le puipuia o ogasami ma atuvasa ma e faitau miliona foi tupe o loo maua ai.
