O le leoleoina o tuaoi o Samoa i le sao mai ai o gaioiga solitulafono e pei o le faaulufale i le atunuu o fuālaau faasāina, o se galuega o loo faaaogā ai ta’ifau sosogi, ma masini fā’ata.
O lea ua faaopoopo atu nisi masini ma meapu’eata i le auaunaga a le matāgaluega o le tiute o loo māta’itūina i aso uma le faaulufale mai o uta ma faamomoli aemaise o oloa e pei o taavale ma masini e ono mafai ona nanā mai ai fuālaau faasāina ma ‘au’upega.
O le malo o Ausetalia o se paaga totino a Samoa ua na foa’i nisi masini fou mo lea tautua ma o se agalelei e tusa ma le 485 afe tālā Ausetalia le tau aofa’i.
Ua faailoa i se pepa o faamatalaga mai le ofisa o le malo o Ausetalia i Samoa, o ia masini fou o le a mafai ai foi ona sa’ili’ili ma le toto’a e le ofisa o le tiute oloa e pei o pauta e faamautinoa ai e lē o ni fuālaau faasāina poo nakoti.
O le sui o lea malo i lo tatou atunuu sa ia tauaao lea foa’i i le minisita ma le pulega o le Matāgaluega o le Tiute i le vaiaso nei.
