Ua ‘au’aufaatasi nei le tele o faalapotopotoga i totonu o Niu Sila e faaulu atu se latou tusi faaseā i le faalapotopotoga o Malo Aufaatasi (UN), ua o latou talosagaina ai i latou e faatino se su’esu’ega i suiga ua faaofi mai nei e le malo o Niu Sila e tusa ai ma tulafono o totogi alagātutusa mo tagata faigaluega.
Ua faia le faaseā ona o le latou iloa ua faailogatagata tele suiga i lenei tulafono, ma o loo lilifa lava i le itupa o tama’ita’i.
I ripoti na faailoa ai o le tausaga talu ai na faalēaogāina ai e le malo nisi o faamanuiaga na mafai ona maua ma fesoasoani atu i le silia ma le 180,000 o tagata faigaluega e to’atele lava o tinā ma tama’ita’i, i auaunaga eseese, e pei o galuega e tausia tagata e iai aafiaga tumau o le soifua, o a’oa’oga, o le soifua mālōlōina ma le tele o auaunaga o le manuia lautele o tagata.
Faamauina o lenei tusi faaseā na auina atu e le PECA poo le Pay Equity Coalition Aotearoa, ma i lalo o lenei faalapotopotoga o loo iai le oo atu i le 20 faalapotopotoga eseese o le atunuu.
Faailoa e le sooupu mo le PECA, o suiga nei ua molimauina ai le tuai ona maua o avanoa e alualu ai i luma tulaga o nai tagata faigaluega, ua autausagā e lē amana’ia pea a latou tulaga.
Faaopoopo le sooupu ua tele ona faafaigatā i le to’atele o tagata faigaluega ona fai a latou talosaga ma ua tele foi vaega o nei tulafono ua faaofi mai ua tauāu ina lē maua ai galuega a nisi.
Na toe faamanatu e le polofesa o le Komesina foi o le Equal Employment Opportunities, Professor Gail Pacheco, mo le Komisi o Aiā Tatau – Human Rights Commission, o totogi e alagātutusa ai tagata faigaluega poo le “pay equity” o se tasi lea o faavae ma vaega tãua o le aiā tatau a le tagata soifua, ma o loo puipuia i lalo feagaiga faavaomalo a Niu Sila.
E to’afā i latou na amataina le faaseā ona o le latou iloa e lē talafeagai tele a latou totogi ma nisi o uso a tagata faigaluega, faapea ua matua’i faailogatagata tele.
O le tasi o nei tagata o le tama’ita’i o Mel Burgess, o se tama’ita’i faia’oga, ma o se sui o le NZEI Te Riu Roa.
Molimau Mel, e lagona lona faanoanoa ona o lona tilotilo iai ua faapogisaina lava i latou ma isi au uso ona o le tulaga o totogi o loo iai aemaise lava ua tele tausaga o taumafai atu mo se suiga lelei.
E ui i se tele o tala ua faailoa atu, ae o loo tumau pea le mau a le malo, ua na o le faafaigofieina o vaega o le tulafono e pei ona ta’ua e le Minisita o Workplace Relations and Safety ia Brooke Van Velden.
Faaopoopo Van Velden o loo sologa lelei lava le faatulagaina o faamanuiaga poo claims i le taimi lenei.
Puna o Faamatalaga: https://www.rnz.co.nz/news/political/594460/formal-complaint-lodged-with-united-nations-over-changes-to-new-zealand-s-pay-equity-laws
