Ua faatonuina nei e le faamasinoga se faalapotopotoga i totonu o Aukilani e totogi atu le faitau afe o tupe i ni tagata faigaluega Pasefika se to’alua; ina ua faamaonia e le faamasinoga o galuega (Employment Court) le faatamala o le faalapotopotoga na galulue ai nei tagata.
O le faatamala e ala mai i le lē savalia o aiaiga ma ta’iala o tū ma aga faa-Pasefika (Pasifika values).
O se taimi muamua lea ua tula’i mai ai se matāupu faapea, ae ua faaalia i ripoti mai le NZ Herald, o se matāupu e ao ona silasila lelei iai i latou o faatonu o galuega ma ē e onaina galuega o loo faafaigaluega ai le to’atele.
I lenei matāupu, ua manumalo ai le alii o John Faitala ma Vahanoa Vea, ma i tulaga o le seleni na manumalo Faitala i le $30,000 ae manumalo Vea i le $45,000, o le seleni ua o la taulimaina mai le faai’uga a le faamasinoga.
O le seleni e totogi ai le tulaga pagatia na o la oo iai ina ua aafia o la tagata i gaioiga a le faalapotopotoga na la galulue ai.
I ripoti a le NZ Herald, na faamanino mai o le faalapotopotoga o loo aafia i lenei matāupu o le Pacific Island Business Development Trust e pei ona faatautaia e le Pacific Business Trust i totonu o Aukilani nei.
Faamauina foi le toe maua ai e Faitala o le oo atu i le 6 masina o lana totogi mai le galuega ae 12 masina o le totogi a Vea.
E tusa ai ma le tagi poo le sū a i la’ua nei, e faailoa e aofia ai lagona faalumaluma ma le mā ina ua oo atu se tusi ua faamuta lo la taimi galue i le faalapotopotoga e tauala atu i se imeli.
Ta’ua e Faitala ma Vea o se tulaga e maofa ma e lē o se ala lea o ni tū ma aga faa-Pasefika. I lo la’ua iloa sa tatau ona faatino i ala e tatau ai, faatino fesaga’i faatalanoaga ma fonotaga ma faatino ai tu ma āga masani o le faitio, talatalanoa; o ala na a tagata Pasefika.
Ae peita’i, ua matua’i leai lava se fesoota’iga.
Ta’ua e John Faitala, e leai ma se faailoa atu o ni fuafuaga, ma o se taimi muamua lea ua ia oo ai i se tulaga faapea aemaise e leai ma se itu e tasi o tū ma aga faa-Pasefika na faatino, o se mea na iai lona taofi o se vaega aupito i tāua lea ona fai.
I ripoti, na ta’ua ai, na folasia lenei matāupu i luma o le Faamasinoga o Galuega poo le Employment Court, ma na faatautaia e le faamasino o Judge Merepaia King.
I lana folasaga, na ta’ua ai e Merepaia King, o le lape o le faalapotopotoga na iai a o faatino fesuia’iga i tulaga o galuega, na lē uia ma savalia e le Pacific Island Development Trust lana matāfaioi, o loo aiaia i lalo o feagaiga na saini lima ai ma tagata faigaluega, o le taga’i lea i tū ma aga faa-Pasefika poo le Pasifika values. O vaega na maioio lelei i lea feagaiga (workers’ employment agreements).
O ia ta’iala o tū ma aga faa-Pasefika e aofia ai vaega tãua e 5, o le Faaaloalo (Respect), Aiga (Family) o le omai faatasi o se aiga ma se nuu e tasi (Community), o le faaleagaga (Religion or Spirituality) ma le agaga o le fetufaa’i (Reciprocity).
Ta’ua e King, o le lē savalia ai e le Trust o nei ta’iala o se ata faata’ita’i lea o le lē mulimulita’ia ai e le faalapotopotoga o a latou lava ta’iala.
E $75, 000 atoa le tupe na manumalo ai John Faitala ma Vahanoa Vea , e lē aofia ai o la totogi mai le faalapotopotoga.
Faaalia o ia suiga na tula’i mai ina ua seei mai se faatonu fou e ta’ita’ia le faalapotopotoga ma amata faatino ai suiga o galuega, ma e 5 avanoa faigaluega na lē toe mafai ona faaauau e aofia ai avanoa a John Faitala ma a Vahanoa Vea.
Comments
Loading comments…