Ua tuuina atu le tali tetee a le ta’ita’i o le vaega faaupufai e puipuia aiā tatau a tagata le susuga Tuilaepa Lupesoliai Sailele Malielegaoi i moliaga o lona faia o ni tala taufaaleaga e faaaogā ai auala o fesoota’iga faatekonolosi.
Ma ua tālia nei le aso 23 o Iuni e faamautū ai se aso o le a su’esu’eina ai molimau a leoleo ma molimau a lē ua molia.
O le Aso Lua o lenei vaiaso ina ua toe valaau lea matāupu tau faamasinoga na tuuina atu ai e le loia o loo tula’i mo Tuilaepa le tali tetee.
Ua faamautū ai foi ma moliaga a leoleo lea e tasi le moliaga o le taufaaleaga faasaga i le ta’ita’i o le vaega e puipuia aiā tatau a tagata i le tagi a le Minisita o A’oga ma Aganuu le afioga Aiono Alec Ekeroma, ae 3 moliaga o le taufaaleaga i le tagi a le Palemia susuga Laauliualemalietoa Leuatea Polataivao Fosi.
Ua talia e le faamasinoga le talosaga a le loia a le itu a leoleo le afioga Maiavatele Timothy Fesili ina ia lē su’esu’eina faatasi moliaga o ia tagi e lua ae tuu eseese i ni faamasinoga se lua e valaau ai molimau.
Ua i luma o le faamasinoga se talosaga a le tama’ita’i faamasino sinia le afioga Talasa Atoa Saaga e lē mafai ona ia su’esu’eina le tagi a le Palemia o loo tuua’ia ai le ta’ita’i o le HRPP.
O le aso 23 la o Iuni e toe valaau ai ia matāupu mo le faamautū ai o aso e valaau ai molimau o tagi e lua o loo tuuaia ai le ta’ita’i o le itu faaupufai e puipuia aia tatau a tagata.
