I lenei vaitau o le tele o aafiaga ma matāupu ua alia’e mai i aafiaga o upega tafa’ilagi i totonu o Samoa, o lea ua faamauina ai le galulue soosootau’au o le Matāgaluega o Leoleo, Falepuipui ma le Toe Fuata’ina ma le Australian Federal Police (AFP), Cyber Safety Pasifika ma le Ekalesia o le Hosanna Christian Church Samoa e tuufaatasia se koneseti ua faaigoaina o le Greatlight Cyber Safety Concert 2026 i le vaiaso fou i Apia nei.
O se faatasiga e faamae’aina ai se tasi o polokalame tele o le Cyber Outreach Program na faatautaia mo le mamalu lautele o le atunuu.
O le a mafai ona maimoa ai le atunuu i nisi o pesepesega ma faatinoga faaleagaga.
E faatautaia le Greatlight Cyber Safety Concert 2026 i le Aso Faraile, aso 15 o Aperila, i luma o le fale o le malo i le Eleele Fou, mai le itula e 6 i le afiafi se’ia pā’ia le 11 i le po.
Ta’ua e sui o loo tuufaatasia lenei polokalame tāua, o le tele o faafiafiaga o lea koneseti, o i latou o tagata pepese iloga o le atunuu, o autalavou ma faalapotopotoga ma ekalesia o le a faafiafia.
Faamaonia foi le amata ai o se tauvaga o se atapu’e e faaaogā ai se pese iloga i luga o le TikTok e faatino e soo se tasi lava mo le manumalo e $500 tālā ma e faalauiloa le atapu’e poo le video ua manumalo i lea po, ma o le video e tele likes o le video lena e manumalo.
Ma ua amata molimauina le tuu a’e i luga o le itulau a le auaunaga o leoleo (SPPCS) o videos a tagata ua amata faatino a latou atapu’e.
E tusa ai ma lenei faamoemoe, o loo aga’i pea e aumai faatasi tagata ina ia iloa le tāua o le saogalemū ma le puipuia i luga o le initaneti poo upega tafa’ilagi i totonu o Samoa.
E tatala le avanoa mo aiga ma uo, faapea fanau e auai, ma e ulufale fua i lenei koneseti.
Puna o Faamatalaga: https://www.facebook.com/share/p/1EHdH88gR2/
