O le amataga o galuega masani o lenei vaiaso na amata faasaini tagata o le itumalo o Safata e faamautū ai le tuuina iai o le tufatufaga e ta’i afe selau tālā mai le taui e 10 miliona mai le malo o Niu Sila ona o le manuao ua goto i gataifale o lea itumalo.
O le Aso Lulu o le vaiaso nei ua fuafua e mae’a ai ona faasaini tagata o le itumalo, ona tuuina atu lea o a latou seleni ia latou teugatupe i faletupe o loo i le atunuu.
Ua faailoa i auala o faasalalauga a le malo i le leitio ma le televise o i latou e leai ni teugatupe e mafai ona ave a latou seleni i teugatupe a se isi tagata peita’i e mana’omia se tusi e faamaonia ai le maliega o le tagata e ana le teugatupe o le a teu iai lana seleni.
