E tusa ai ma faamaumauga, o le vaitau o le tausaga e 1980 na ulua’i faatino ai i Samoa togafitiga faafoma’i e faaaogā ai auala faafoma’i a Saina le acupuncture poo nila e tui i vaega eseese o le tino.
Sa alu alu lē toe faia ae na toe aumai i nisi o tausaga mulimuli ane ai.
O lea ua toe faatino ia togafitiga ma ua tatala ai se nofoaga i le maota gasegase o Tupua Tamasese Meaole i Motootua e faatino ai, ma ua iai ma ni foma’i mai Saina e iai tomai a’oa’oina i ia togafitiga latou te faafoeina.
E lē gata o le faaaogā o nila ia latou togafitiga ae o le a faaaogā ai foi le fofō e ta’ua o le cupping ma isi auaunaga faafoma’i faa-Saina o le a togafiti ai gasegase o ponaivi.
O le Aso Lua o le vaiaso nei na tatala ai e le Minisita o le Soifua Mālōlōina lea auaunaga i totonu o le maota gasegase i Motootua, lea sa auai ma le amepasa o le malo o Saina e faamautū i Samoa.
O se tasi lea o auaunaga faafoma’i o le a maua ai e le atunuu ia ituaiga o togafitiga e faaaogā iai auala faanatura a Saina ua silia i le luaafe tausaga o faaaogā e fofō ai gasegase i lea atunuu.
