A o faasolo ai le kuata lona lua o le tausaga faalea’oa’oga a fanau i lenei tausaga, o lea ua oo mai faamaumauga mai le Matāgaluega o A’oga i totonu o Niu Sila nei, ua latou valo’ia ai le ono pa’ū maualalo o le numera o fanau o le a resitala mo a’oga i tausaga a sau.
Ua faamauina o le tausaga na se’i mavae atu nei sa māua ai i faamaumauga le maualuga tele o numera o fanau a’oga na resitala; o se numera aupito i maualuga lea i faamaumauga a le Matāgaluega.
I faamatalaga mai le ripoti a le National School Roll Projections, na ta’ua ai le oo atu i le 849,385 fanau a’oga na resitala i le tausaga e 2025, ae o le tausaga lenei e 2026 e 846,386 fanau na resitala, ae o le latou tilotilo pe oo atu i le 808,561 fanau a’oga o le a resitala i le oo atu lea i le tausaga e 2035.
O lenei numera e tusa ai ma ripoti o numera mo fanau a’oga e atoa lelei aso o a’o’oga, poo fanau e atoa lelei le 20 itula i totonu o potu a’oga.
O le talitonuga o loo iai o le faaitiitia o lenei numera o le a vaaia ai le pa’ū mai o fanau mai a’oga tulagalua – primary ma le intermediate mai le 526,590 o le tausaga talu ai, i le 497,494 i le tausaga e 2035.
Ua feta’ua’ina o a’oga maualuluga o le a vaaia le alu i luga o le numera o fanau a’oga e resitala i le tausaga lenei i le 325,050 a o le’i toe faaitiitia aga’i i le 311,067 i le tausaga e 2035.
I ripoti mai le leitio faavaomalo a Niu Sila, e faapea o nei faamaumauga e pei ona faatusatusa mai numera a le Matāgaluega i le 10 tausaga talu ai e pei ona māua le siitia o le pasene o fanau e resitala i le 1% i lea tausaga ma lea tausaga talu mai le tausaga e 2015.
Ua faamanino mai, o ia faaopoopoga i fanau na molimauina ai le siitia mai le 760,792 i le tausaga e 2014 aga’i i le 850,000 i le tausaga na te’a nei o le 2025.
O le tasi o vaega na molimauina ai le alu alu i luma o lenei numera o tagata malaga mai i totonu o Aotearoa nei, e pei ona māua le oo atu lava i le 2.2% fanau na resitala o ē na malaga mai fafo oo atu i le 17,937 i le tausaga e 2024, o se numera tele o fanau ua resitala e mai fafo.
Puna o Faamatalaga: https://www.rnz.co.nz/news/education/593640/school-enrolments-forecast-to-drop-after-reaching-record-high-last-year
