E tolu nofoaga o loo faatino ai le auaunaga a le pulega o le tineimu ma galuega lavea’i i taimi o faalavelave faafuase’i, ua manuia i le foa’i a le malo o Iapani e ala i taavale e faatino ai le latou tautua.
O le nofoaga tutotonu o le pulega i Apia, o le nofoaga i le itumalo o Aana ma Maota i Savaii.
E lua taavale veni fou e 14 nofoa ma se pikiapu fou foi ua aumai e lea malo agalelei o se foa’i na faamautū i le faigāpaaga a Iapani ma lea pulega ia Novema o le tausaga ua mavae.
O se tasi lea o tautua e mana’omia ai taavale ia latou galuega ma ua fetaui lelei ma le foa’i, ae o le fautuaga masani ia putiputi ma vaai lelei auā e lē taugofie.
E 356 afe 521 tālā le tau o ia taavale fou.
O le sui o le malo Iapani i Samoa sa ia tauaao atu i le Minisita Lagolago o le pulega o le tineimu ma galuega lavea’i i taimi o faalavelave faafuase’i lea foa’i tāua, ae sa molimauina e le pulega ma le aufaigaluega o lea pulega ma sui o le malo.
