Na faate’ia le to’atele o tagatānuu o Porirua i le faafuase’i ai ona aafia o latou faaitu i lōlōga ona o timuga mamafa i le faai’uga o le vaiaso talu ai.
I ripoti mai le leitio faavaomalo a Niu Sila, na o latou faailoa ai le ono toe aafia o Porirua i timuga mamafa i lenei vaiaso.
Ae o se vaega o loo taumafai e tapena aga’i iai lea itumalo talu ai tulaga pagātia na oo iai le to’atele, e pei o le faaleagaina o meatotino ma fale i lōlōga.
O le Aso Toonai na tula’i mai ai lenei faafitauli i Porirua, ma o le Aso Sa na tuuina mai ai se fautuaga o le iai o lapata’iga i le lanu samasama mo timuga mamafa e amata atu i le asō, Aso Gafua faapea ai ma matagi malolosi i le aoauli.
I itu lata ane, na faailoa ai le iai o fautuaga ma lapata’iga o timuga mamafa o le lanu moli mo le Hutt Valley ma isi itu o Ueligitone.
I Judgeford, na faaalia ai e se ulugalii, e iai se vaitafe e latalata i lo la fale na molimauina le maualuga o le tafe o le vai ma na oo atu lava i le fale ma le fanua.
O se vaega lena na faamatalaina ai le tele o mea na faaleagaina, ma o se lōlōga aupito i mata’utia lea i le la’ua maitau.
Ma ona o le ogaoga o aafiaga na o la faaalia ai le moomia e le faigānuu ma le malo ona tilotilo lelei i le toe faaleleia o vaega eseese o le nuu.
E pei o le taga’i lea e toe faatino ni galuega e faamalosia ai itu e taofia ai le tele o itu mai le faaleagaina, ma le oo ai i tulaga pagātia.
Puna o Faamatalaga: https://www.rnz.co.nz/news/weather/592804/after-the-deluge-flood-clean-up-in-porirua
