O le aso 18 o Setema o le tausaga nei o le a valaau ai molimau a leoleo e lagolago ai a latou moliaga e lua o le taufaaleaga ua tuua’ia ai le tama’ita’i tusitala o Marieta Ilalio, e māfua i se lipoti sa ia tusia ma faasalalau i le nusipepa o le Samoa Observer.
O le moliaga e māfua i lea lipoti sa tuua’ia i le faaaogā e ni alo tama o le Palemia o se taavale a leoleo, ma le suia atu i le pou a leoleo i Tuanaimato o se leoleo sinia e galue ai, ae o lea malu o le malo sa ia vaaia le vaega o taavale afi i le ofisa autū o leoleo i Apia.
O le Aso Lua o lenei vaiaso na tula’i ai le tusitala i le Faamasinoga Faaitumalo ma tuuina atu ai e le loia o loo tula’i mo Marieta le tali tetee i moliaga uma e lua.
O le tama’ita’i loia o Leone Ma’ilo Su’a o loo finauina le tetee a le tusitala.
