Ua tuli nei le faasalaga soloatoa i le falepuipui o le tamā o Pokati Tuu poo Pokati Faatauī ina ua aumai le faai’uga a le laulau o faatonu i le Aso Faraile ua mavae, ua faamaonia moliaga e lua o le fasioti tagata faamoemoeina sa tetee iai Pokati, a o su’esu’eina molimau i le lua vaiaso ua mavae.
O le faasalaga soloatoa e pei ona aiaia i le tulafono e 10 tausaga e tuli ona agavaa lea o lē ua faasalaina e talosaga i se avanoa e magalo ai i aiaiga o le palola.
Peita’i o le a su’esu’eina e le faamasinoga le talosaga a loia a leoleo mo se 20 tausaga e tuli o le faasalaga soloatoa o lē ua molia ona faato’ā agavaa lea i le palola.
Ua tapena ai nei loia a leoleo ma le loia sa tula’i mo lē ua nofosala mo ni folasaga a o le’i faia se faai’uga a le faamasinoga pe talia lea talosaga a leoleo.
O Pokati Tuu na molia ona o le maliu o le leoleo satini o Peniamina Perite ma le tamā o Lafaele Iosefo o Nofoalii ia Setema o le tausaga e 2024.
O se solitulafono na faaaogā ai e lē ua molia le ‘au’upega o se laaumalosi.
