Ua faasala nei e le faamasinoga faaitumalo i Hmilton se tama’ita’i e faanofo vaavaaia i lona fale poo le home detention, ina ua faamaonia lona gaoia o se taavale a o ia umia ma faaaogāina o le fuālaau faasāina o le methamphetamine.
Ae o le mea mata’utia i lea matāupu, e gaoia e lenei tama’ita’i le taavale ae na iai se alualutoto i totonu o le taavale.
O lē ua molia o le tama’ita’i o Theresa Anne Johnson 59 tausaga le matua, ma na ia ioeina lava lona gaoia o le taavale ma le tala, na lē mana’o e savali mo le 2 kilomita agai i Gisborne i Kaiti.
I le talaaga o lenei matāupu, e faapea poo le kuata e te’a ai le itula e 1 i le aoauli o le aso 6 o Fepuari o le tausaga talu ai i fafo atu o le fale’aiga poo le bakery a le Golden Crust i Gladstone Rd i Gisborne na tupu ai lea matāupu.
E faapea na tu le taavale a se ulugalii i luma o lenei fale’aiga e faatau se mea’ai o le aoauli, ae na tuu lava i totonu o le taavale le la tama e 4 masina le matua ma o loo ki le taavale e faaolaola pea le afi, ona sa manatu e ki pea le ea mālūlū.
Ae le’i leva lava ona aga’i i totonu le ulugalii ae oso loa le tama’ita’i o Theresa i le taavale ma alu ese ma luma o le faleoloa ma le itu na paka ai le taavale, ma i faamatalaga sa fai lava sina faaletonuga o le tama’ita’i ona ua tauāu ina aafia uma atu ai isi taavale i luga o le auala i lona taumafai ai e alu ese ma le taavale.
Faamauina na aga’i ese atu Theresa i le itu i Sisifo o Gladstone Rd ma e faapea sa fai lava sina saoasaoa o le alu o le taavale, ma na molimauina le alu lē tapasā o Theresa i luga o le auala i lona tipitipi taavale solo ma fesuisuia’i itu e alu ai e aunoa ma se faailoilo i avetaavale.
Ta’ua a o alu le taavale o lea na faato’ā iloa ai e lē ua molia o loo iai se pepe i le pito i tua o le taavale.
O lea na taofia ai le taavale i Childers Rd, aveese mai le tamaitiiti mai le taavale ae tia’i i autafa o le auala savali – footpath ae sola ese.
Faailoa i faamatalaga i totonu o le faamasinoga, e le’i iai se manatu o Theresa e logo leoleo pe toe faafoi le pepe i le aiga poo le ulugalii.
Na maua mulimuli ane le pepe e se tasi o le mamalu lautele, ma o lea na ia logoina ai loa leoleo.
Faamatala e le tinā o le pepe lona popole tele ina ua tula’i mai lenei matāupu, ma ua ese ai lava ona faalogona, ua lē maugagana talu ai o se taimi muamua lea ua tupu ai se mea faapea, aemaise o le ave ese atu faapea o si ana tama.
Na tula’i Theresa Anne Johnson i luma o le Faamasinoga Faaitumalo o Hamilton, ma e faamauina le tele o moliaga na molia atu ai le tama’ita’i 59 tausaga; e aofia ai le tuulafoa’i o se pepe poo se tamaitiiti, ave taavale faatamala, ma le aveina o le foeuli ae o loo tapu ona ia aveina se taavale, o le ave faasolitulafono ai o se taavale poo le gaoi, o lona lē savalia o aiaiga o le galue ai mo le manuia lautele o tagata poo le community work ma lona ave faagaoi ai o ofu e oo atu i le $1,400 le tau.
O le moliaga o le gaoi, e faapea e fesoota’i atu lea i le matāupu na tula’i mai i se tasi o faletāmea poo se laundromat i Hamilton i le aso muamua o Iulai o le tausaga e 2025, lea na gaoi ai e Theresa ofu o se tasi o alii na avatu ona ofu e tatā.
Faamatala e loia a lē ua molia, ua lagona e Theresa lona salamō ona o aga gaioiga na faatino i sia aiga ma si a la tamaitiiti, o lona agaga faafetai e le’i āfaina le pepe.
I le folasaga a le itu a lē ua molia, o lea na faamauina ai e mafai e Theresa Anne Johnson ona ia togitogi atu $10 tālā Niu Sila i lē na aafia i le faletamea, ae o loo fetuuna’i le $500 e totogi atu ona o aafiaga o faalogona faaletagata o lē ua aafia.
Ae i le faai’uga a le faamasino ia Singh e tuu atu le $20 tālā le tupe e togitogi i le vaiaso.
Na amata mai le faasalaga o lē ua molia i le 24 masina e ae na tuuitiitia le taimi aga’i i le 14 masina e nofosala ai i le falepuipui; ae peita’i talu ai e le’i faanofo vaavaaia lava lea tama’ita’i poo le home detention, o lea na suia mai loa e le faamasinoga le faai’uga e faanofo vaavaaia ai i le fale mo le 8 masina, ma le 9 masina e faatino ai asiasiga ma galuega o le toefuata’ina mo lea tama’ita’i (nine months of post-detention conditions).
Puna o Faamatalaga: https://www.nzherald.co.nz/nz/theresa-johnson-stole-car-with-baby-inside-then-dumped-infant-on-side-of-road-before-driving-off/B2ZDGZ4THJATTOOPHTQ3ZOO2DY/
