O se tama’ita’i Niu Sila, o Everlee Wihongi, ua silia ma le 25 tausaga o nofo i le Iunaite Setete, ua taofia nei i se nofoaga o le ICE i Kalefonia, ina ua toe foi atu mai i se malaga puupuu na sau ai i Niu Sila.
Sa nofo faaletulafono o ia i Wisconsin, ma o loo a‘oa‘oina i le galuega uelo (welder).
Na malaga mai Everlee i Niu Sila mo le tolu vaiaso e auai i le aso fanau, o le atoaga o le 80 tausaga o lona uncle.
Ae ina ua toe malaga atu i Amerika i le aso 10 o Aperila, sa taofia ai o ia e leoleo o le ICE i le malae vaalele i Los Angeles, e aunoa ma se faamalamalamaga manino.
Na ta‘ua e le to’alua o lona tuagane, Courtney Wihongi, sa faailoa atu e le ICE o loo faia ni siaki, peita‘i e le‘i toe vaaia Everlee e lona aiga talu mai lena taimi.
Ua silia ma le vaiaso, ae e le‘i maua lava se faamatalaga manino i le māfua’aga o le taofia ai o Everlee.
O loo galulue nei le aiga ma loia e sa’ili se auala e mafai ai ona tatala o ia i tua i luga o le bail, peita‘i o loo ta‘ua e le loia e mana‘omia se pepa aloa‘ia e faailoa ai le māfua’aga o lona taofia, ae e le‘i tuuina atu lea pepa e le ICE e ui ua talosagaina faalua.
O loo taumafai le aiga e faatumauina lona loto malosi ma le faamoemoe a o faaauau pea le matāupu.
